មជ្ឈមណ្ឌលតាំងពិព័រណ៍ស្តង់ដារអន្តរជាតិ - B2B Park នឹងដំណើរការជាផ្លូវការនៅឆ្នាំក្រោយ។ គំរោងនេះស្ថិតនៅក្នុងខណ្ឌសែនសុខដែល អគារមានកំពស់ ៦ ជាន់មានទំហំជាង ២ ហិកតា ដែលអាចផ្តល់រចនាសម្ព័ន្ធយ៉ាងងាយស្រួលដើម្បីផ្ទុកកន្លែងប្រើប្រាស់ទូទៅ ហាងលក់គ្រឿង អេឡិចត្រូនិក សាលតាំងពិព័រណ៍ រោងកុន និងការិយាល័យសម្រាប់ជួល។ ក្រៅពីនេះវាក៏មានកន្លែងចតរថយន្តគ្រប់គ្រាន់សម្រាប់ផ្ទុករថយន្តបានជាង ៥០០ គ្រឿងផងដែរ។
យោងតាមនាយកប្រតិបត្តិក្រុមហ៊ុន B2B Park - លោក Thourn Sinan បាននិយាយថាកត្តាដែលជំរុញអោយលោកធ្វើការវិនិយោគលើវិស័យនេះ គឺដោយសារលោកបានឃើញមានការខ្វះខាតនៃសាលពិព័រណ៍អន្ដរជាតិនៅក្នុងប្រទេស។ លោកជឿជាក់ថាទីតាំងនេះនឹងទាក់ទាញអតិថិជនជាច្រើន ព្រោះទីតាំងនេះស្ថិតក្នុងតំបន់ដែលមិនមានការប្រកួតប្រជែងនិងឆ្ងាយពីផ្សារទំនើបដែលមានស្រាប់។
ប្រធានសមាគមអ្នកវាយតម្លៃ និង ភ្នាក់ងារអចលនវត្ថុកម្ពុជា លោក ច្រឹក សុខនីម បានអត្ថាធិប្បាយថាប្រាក់ចំណូលកើនឡើងនិងនិន្នាការកើនឡើងនៃការចាប់យកផលិតផលទំនើបបានផ្តល់នូវតម្រូវការទីផ្សារល្អសម្រាប់មជ្ឈមណ្ឌលពាណិជ្ជកម្មចម្រុះនិងកន្លែងតាំងពិព័រណ៍ហើយមនុស្សកាន់តែច្រើនកំពុងបង្វែរអាជីវកម្មរបស់ពួកគេទៅតំបន់ដែលងាយស្រួលធ្វើដំណើរជាង។
|