កម្ពុជានិងរុស្ស៊ីបានសន្យាបង្កើនទំហំពាណិជ្ជកម្មនិងការវិនិយោគទ្វេភាគី។ ព្រះរាជាណាចក្រកម្ពុជាមានគោលបំណងធ្វើពិពិធកម្មទីផ្សាររបស់ខ្លួនតាមរយៈសហភាពសេដ្ឋកិច្ច Eurasia Economic Union (EAEU)។
លោកឧបនាយករដ្ឋមន្រ្តី ហោ ណាំហុង ដែលបានជួបជាមួយឯកអគ្គរដ្ឋទូតរុស្ស៊ីប្រចាំនៅកម្ពុជា លោក Dmitry Tsvetkov បានមានប្រសាសន៍ថា ប្រទេសទាំងពីរមានទំនាក់ទំនងការទូតល្អ ដែលបន្តទទួលបានការគាំទ្រយ៉ាងខ្លាំងពីសំណាក់ប្រទេសរុស្ស៊ីទៅលើកំណើនសេដ្ឋកិច្ចរបស់ប្រទេសកម្ពុជា។
លោកបានបន្ថែមទៀតថាចាប់តាំងពីឆ្នាំ២០១៥មក ប្រទេសរុស្សីបានចុះហត្ថលេខាលើកិច្ចព្រមព្រៀងចំនួន៥១ ដើម្បីជម្រុញពាណិជ្ជកម្មនិងការវិនិយោគនៅក្នុងវិស័យហិរញ្ញវត្ថុ កសិកម្ម និងវិស័យផ្សេងៗជាច្រើនទៀត។ កាលពីឆ្នាំមុន ពាណិជ្ជកម្មទ្វេភាគីបានកើនឡើងដល់៥៥,៣៩លានដុល្លារ ហើយបច្ចុប្បន្ននេះរដ្ឋាភិបាលកំពុងពិនិត្យមើលអនុស្សារណៈយោគយល់គ្នាចំនួន១៤ផ្សេងទៀត ដែលផ្តោតលើវិស័យទេសចរណ៍ វិស័យអប់រំ ច្បាប់និងយុវជន ដែលរំពឹងថានឹងត្រូវចុះហត្ថលេខានាពេលឆាប់ៗនេះផងដែរ។
លោក Dmitry Tsvetkov បានកត់សម្គាល់ពីការអភិវឌ្ឍន៍យ៉ាងឆាប់រហ័សរបស់ប្រទេសកម្ពុជានិងមានការចាប់អារម្មណ៍ចំពោះការពិតដែលថា ទោះបីប្រទេសកម្ពុជាមិនមែនជាប្រទេសផលិតប្រេងក៏ដោយ ក៏គេសង្កេតឃើញសេដ្ឋកិច្ចកើនឡើងប្រមាណ៧ភាគរយកាលពីឆ្នាំមុន។ លោកបានឲ្យដឹងថា ក្រុមការងារកម្ពុជា-រុស្ស៊ី បានចាប់ផ្តើមចរចារលើកិច្ចព្រមព្រៀងពាណិជ្ជកម្មសេរីជាមួយ Eurasia Economic Union (EAEU)ហើយ។
|