ក្រសួងរៀបចំដែនដីនគរូបនីយកម្មនិងសំណង់ បានរាយការណ៍ថា ឧស្សាហកម្មសំណង់នៅក្នុងប្រទេសនៅតែមានស្ថេរភាពទោះបីពិភពលោកកំពុងប្រឈមនឹងការធ្លាក់ចុះដ៏ធ្ងន់ធ្ងរដោយសារបញ្ហាមេរោគ COVID-19 ក៏ដោយ។ អ្នកនាំពាក្យក្រសួង លោក សេង ឡុត បានបង្ហើបថា គម្រោងសាងសង់កំពុងកើនឡើងនៅក្នុងប្រទេសនានានៃតំបន់អាស៊ីអាគ្នេយ៍។ នៅចុងខែកុម្ភៈឆ្នាំនេះ មានគម្រោងសាងសង់ជាង៥០០គម្រោងបានដាក់ពាក្យសុំការអនុញ្ញាតជាមួយក្រសួង បើប្រៀបធៀបទៅនឹងឆ្នាំមុនដែលមានតែ៣០០គម្រោង នេះបានបង្ហាញឲ្យឃើញថា ឧស្សាហកម្មនេះមិនរងផលប៉ះពាល់ធ្ងន់ធ្ងរទេ។
វិនិយោគិនកំពូលៗចំនួន៣មាន ប្រទេសចិន សាធារណរដ្ឋកូរ៉េ និងជប៉ុន។ លោកបានបញ្ជាក់បន្ថែមថា បើទោះបីជាចំនួននៃករណីមេរោគ COVID-19 នៅកម្ពុជាមានការកើនឡើងក៏ដោយ ក៏មិនមានការពន្យារពេលលើគម្រោងធំៗនោះឡើយ។ យោងតាមតួរលេខដែលក្រសួងបានផ្សព្វផ្សាយ ការវិនិយោគក្នុងវិស័យនេះសម្រេចបានប្រមាណ១១ពាន់លានដុល្លារអាមេរិក ក្នុងឆ្នាំ ២០១៩ ដែលជាតួរលេខកើនឡើងជិត៩០ភាគរយ ពីទំហំ ៥,៥ពាន់លានដុល្លារ ក្នុងឆ្នាំ ២០១៨ ។
លោក គីម ហ៊ាង នាយកប្រតិបត្ដិប្រចាំតំបន់នៃក្រុមហ៊ុនអចលនៈទ្រព្យមួយដែលមានមូលដ្ឋាននៅសហរដ្ឋអាមេរិកឈ្មោះ Keller William Cambodia បានអត្ថាធិប្បាយថា ទោះបីបច្ចុប្បន្ននេះកំពុងប្រឈមនឹងការរាតត្បាតយ៉ាងណាក៏ដោយ ក៏នេះជាឱកាសអាចឱ្យក្រុមហ៊ុនសាងសង់ចរចារតម្លៃពលកម្មនិងថ្លៃដើមទាបជាងមុន។ ក្នុងពេលជាមួយគ្នានេះ អ្នកអភិវឌ្ឍន៍ក៏ទទួលបានអត្ថប្រយោជន៍ពីការលើកលែងពន្ធ៤ភាគរយពីរដ្ឋាភិបាល ចាប់ពីខែកុម្ភៈ ឆ្នាំ២០២០ ដល់ខែមករា ឆ្នាំ២០២១ ផងដែរ។
|