|
|
|
|
|
|
|
ភាពចម្រុះពណ៌ស្របទៅនឹងគោលគំនិតខ្ពស់
|
|
ប៉ែន រ៉ូប៊ីត ដែលជាវិចិត្រករក្នុងស្រុកដ៏ល្បីម្នាក់បានធ្វើការតាំងពិពណ៌ទោលនៅវិចិត្រសាល សិល្បៈត្រជាក់ភ្នែក (STP) ដែលមានឈ្មោះថា Wings of Tomorrow។ ពីរខែក្រោយមក នៅថ្ងៃ០៣ ខែមីនា គាត់បានរៀបចំការតាំងពិពណ៌អាថ៌កំបាំងនិងអស្ចារ្យដែលមានឈ្មោះថា The Ontology of Form and Color នៅវិចិត្រសាលសិល្បៈ Rosewood ដែលនឹងដាក់តាំងបង្ហាញរហូតដល់ចុងខែមេសា។
ការតាំងបង្ហាញរួមមាន គំនូរប្រេងចំនួន២១ និងថ្នាំលាបផ្ទះ enamel U-90 នៅលើផ្ទាំងក្រណាត់។ Ontology of Form and Color កើតឡើងពីការស្រមើស្រមៃរបស់រ៉ូប៊ីតអំពី សញ្ញាណនៃទម្រង់និងទេសភាពក្នុងបរិបទនៃបរិស្ថានដែលបង្កើតឡើងដោយមនុស្ស ជាមួយនឹងការប្រើប្រាស់ពណ៌ខ្មៅនិងពណ៌ក្រហមនៅផ្ទៃខាងក្រោយជានិមិត្តរូបនៃការកសាងឡើងវិញក្រោយជម្លោះរបស់កម្ពុជា។
លោក យាន រស្មី ស្ថាបនិកនិងជានាយកកម្មវិធីរបស់ STP ថ្លែងក្នុងសុន្ទរកថាបើករបស់គាត់ថា ការចាប់អារម្មណ៍របស់រ៉ូប៊ីតចំពោះក្រមានិងប្រវត្តិរបស់វាចាប់ផ្តើមពីគ្រូសិល្បៈរបស់គាត់ គឺអ្នកស្រី ស្រី បណ្ដូល និងនៅពេលដែលគាត់ទៅវាលពិឃាតក្នុងសិក្ខាសាលា "ការចងចាំ" របស់គាត់។
រ៉ូប៊ីតពន្យល់បន្ថែមថា គាត់កំពុងផ្តោតលើអគារ ស្ពាន និងទីក្រុង ដើម្បីស្វែងរកពណ៌បន្ថែមទៀត។ គាត់បានរៀនរឿងខ្មែរក្រហមពីអ្នកស្រី ស្រី បណ្ដូល ហើយតាមរយៈប្រវត្តិសាស្ត្រនោះហើយដែលគាត់ចាប់អារម្មណ៍លើក្រមា។
គាត់ចាប់អារម្មណ៍នឹងប្រវត្តិសាស្រ្តរបស់វា និងរបៀបដែលក្រមាត្រូវបានប្រើប្រាស់នៅក្នុងសង្គមកម្ពុជា ជាពិសេសនៅក្នុងសម័យខ្មែរក្រហម នៅពេលដែលវាឆ្លុះបញ្ចាំងពីស្ថានភាព និងប្រវត្តិរបស់មនុស្ស។
«ខ្ញុំចង់ប្រមូលផ្ដុំប្រវត្តិសាស្ត្រកម្ពុជាអំពីរបៀបដែលប្រទេសនេះបានងើបឡើងវិញ និងបង្កើតទីក្រុងឡើងវិញ និងកសាងហេដ្ឋារចនាសម្ព័ន្ធផ្សេងទៀតឡើងវិញបន្ទាប់ពីសម័យនោះ។ ខ្ញុំបានប្រើក្រមាជាគោលគំនិតចម្បងរបស់ខ្ញុំ ដូចដែលអ្នកអាចមើលឃើញយ៉ាងច្បាស់នៅក្នុងគំនូររបស់ខ្ញុំ ហើយវាតំណាងឱ្យវប្បធម៌ និងទំនៀមទម្លាប់»។
នៅក្នុងស្នាដៃមុននេះ រ៉ូប៊ីតបានប្រើក្រមាជាក្រណាត់តភ្ជាប់គ្នាដែលត្បាញរួមគ្នានូវសមាសធាតុនានាពាសពេញរាងកាយនៃសង្គម ហើយនៅក្នុង The Ontology of Form and Color ការស៊ើបអង្កេតរបស់គាត់ទៅលើក្រមានៅតែបន្តព្រោះវាត្រូវបានផ្សារភ្ជាប់ជាមួយនឹងលក្ខខណ្ឌទីក្រុងនិងសកលលោក ដោយប្រើប្រាស់ថ្នាំលាបឧស្សាហកម្ម U-90 និងសំណាញ់ដែក។
វិចិត្រករវ័យ៣១ឆ្នាំរូបនេះបានមានប្រសាសន៍ថា "នៅពេលដែលពិភពលោកត្រូវបានជាប់នៅក្នុង 'យុគសម័យ ងងឹតថ្មី' ពណ៌តែងតែអាចជួយបំភ្លឺនិងជីវិតរបស់យើង វាបានផ្តល់ឱ្យពិភពលោកនូវភាពស្រស់ស្អាត និងក្តីសង្ឃឹមមួយចំនួន" ។
កម្មវិធីនេះផ្តល់ពេលវេលា និងធនធានដល់វិចិត្រករគ្រប់រូប រួមទាំងកន្លែងសម្រាប់បណ្ណាល័យ និងធនធានហិរញ្ញវត្ថុ និងជំនួយផ្នែករដ្ឋបាលផ្សេងទៀត ដើម្បីឱ្យសិល្បករម្នាក់ៗអាចអភិវឌ្ឍសិប្បកម្មរបស់ពួកគេ និងស្វែងរកគំនិតថ្មីៗប្រកបដោយភាពច្នៃប្រឌិត។
“កន្លែងស្នាក់នៅរបស់យើងត្រូវបានគាំទ្រដោយស្ថានទូតសហរដ្ឋអាមេរិកនៅកម្ពុជា ហើយរ៉ូប៊ីត គឺជាអ្នកដំបូងដែលបានទទួលវា ហើយឥឡូវនេះយើងមានអ្នកទទួលម្នាក់ទៀតគឺ ចាន់ ដានី។ ឥឡូវនេះគាត់កំពុងផ្លាស់ប្តូរវិចិត្រសាលទៅជាស្ទូឌីយោស្រាវជ្រាវដើម្បីអភិវឌ្ឍការងាររបស់គាត់។ សង្ឃឹមថាគាត់នឹងបញ្ចប់នៅថ្ងៃណាមួយឆាប់ៗ»។
ដំណើរការច្នៃប្រឌិតរបស់រ៉ូប៊ីតអនុញ្ញាតឱ្យមានអន្តរកម្មរវាងការគ្រប់គ្រងនិងការដោះលែង ដែលជាថាមវន្តដែលជាចំណុចកណ្តាលនៃទស្សនៈព្រះពុទ្ធសាសនាអំពីផ្លូវឆ្ពោះទៅរកការរំដោះ។
The Ontology of Form and Color ចាប់ដៃគ្នាដំបូងរវាង STP និង Rosewood ហើយរស្មីមានប្រសាសន៍ថា លោកសង្ឃឹមថាពួកគេអាចបន្តធ្វើការជាមួយគ្នានាពេលខាងមុខ ដើម្បីលើកស្ទួយសិល្បៈករខ្មែរ និងលើកស្ទួយវប្បធម៌ខ្មែរ។
|
|
|
|
|
|
|
|
|
