បទចំរៀងដើមរបស់អ្នកចំរៀងនិងតារាសម្តែងជនជាតិជប៉ុន លោកស្រី មីណាមីណុ យ៉ូកុ ដែលមានឈ្មោះថា “ឥន្ធធនូសម្រាប់ថ្ងៃស្អែក” ត្រូវបានប្រគល់ជូនកម្ពុជាដែលជាការរឹតចំណងមិត្តភាព ក្នុងពិធីប្រគល់មួយរវាងអ្នកការទូតជាន់ខ្ពស់នៃប្រទេសទាំងពីរ។ 
 

លោកជំទាវ ទួត បញ្ញា រដ្ឋលេខាធិការនៃក្រសួងការបរទេសនិងសហប្រតិបត្តិការអន្តរជាតិ បានឲ្យដឹងថា បទចម្រៀងដ៏ស្រស់ស្អាតមួយនេះ បានអង្រួនបេះដូងលោកនាយករដ្ឋមន្រ្តី ហ៊ុន សែន នៅពេលបទចម្រៀងមួយនេះត្រូវបានចាក់នៅជំនួបអាហារពេលល្ងាចជាមួយសមភាគីជប៉ុន Fumio Kishida នៅទីក្រុងកូម៉ាម៉ូតូ ប្រទេសជប៉ុន ក្នុងកិច្ចប្រជុំកំពូលស្តីអំពីបញ្ហាទឹកក្នុងតំបន់អាស៊ីប៉ាស៊ីហ្វិចលើកទី៤។លោកនាយករដ្ឋមន្រ្តី ហ៊ុន​ សែន បានផ្ញើរលិខិតសាទរចំពោះការនិពន្ធចំរៀងមួយនេះ។ 
 

បើតាមប្រសាសន៍របស់លោកជំទាវ ទួត បញ្ញា បានឲ្យដឹងថា លោកស្រី មីណាមីណុ រួមនឹងម្ចាស់កម្មសិទ្ធិរួមផ្សេងទៀតបានផ្តល់សិទ្ធិក្នុងការចាក់ផ្សាយបទចំរៀងនេះក្នុងបណ្តាញផ្សព្វផ្សាយសង្គមរបស់រាជរដ្ឋាភិបាលកម្ពុជា ដែលអនុញ្ញាតិឲ្យធ្វើការចាក់ផ្សាយលើទូរទស្សន៍ដែលបានចុះបញ្ជីជាមួយរដ្ឋាភិបាល។ 
 

លោកស្រី មីណាមីណុ ដែលជាតារាដែលមានអ្នកតាមដានយ៉ាងច្រើនសន្ធឹកសន្ធាប់ក្នុងប្រទេសជប៉ុនរូបនេះ មានចំណងយ៉ាងជិតស្និទជាមួយនឹងប្រទេសកម្ពុជា។ លោកស្រីបានមកទស្សនាប្រទេសកម្ពុជាលើកទីមួយនៅក្នុងឆ្នាំ១៩៨៩ក្នុងកម្មវិធីទូរទស្សន៍មួយ ហើយបានមកសារជាថ្មីនៅក្នុងឆ្នាំ២០១៣។