|
ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគជប៉ុនចំនួន ១៤៩ ដែលមានទុនវិនិយោគសរុបប្រមាណ ២,៩ ពាន់លានដុល្លារកាលពីខែមុន។
តួលេខនេះត្រូវបានបង្ហាញនៅក្នុងកិច្ចប្រជុំលើកទី២៤ នៃគណៈកម្មាធិការចម្រុះកម្ពុជា-ជប៉ុន ដែលធ្វើឡើងនៅដើមខែនេះ ក្រោមអធិបតីភាពរបស់លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការ CDC និងលោក Mikami Masahiro ឯកអគ្គរាជទូតជប៉ុនប្រចាំនៅកម្ពុជា។ ការចូលរួមពីតំណាងក្រុមហ៊ុន JETRO JICA JBAC និងក្រុមហ៊ុនជប៉ុនដែលកំពុងប្រតិបត្តិការនៅកម្ពុជា។
នៅក្នុងជំនួបនោះ លោក សុខ ចិន្តាសោភា បានវាយតម្លៃខ្ពស់ចំពោះសកម្មភាពវិនិយោគរបស់វិនិយោគិនជប៉ុនទាំងអស់ ដែលតែងតែជឿជាក់លើរដ្ឋាភិបាលកម្ពុជាដែលធានាបាននូវសន្តិភាព ស្ថិរភាពនយោបាយ និងសេដ្ឋកិច្ច ដែលជាកត្តាសំខាន់ក្នុងការបង្កើតបរិយាកាសវិនិយោគដ៏អំណោយផល។
ឯកអគ្គរដ្ឋទូតជប៉ុនបានថ្លែងអំណរគុណចំពោះក្រសួង និងស្ថាប័នពាក់ព័ន្ធចំពោះការខិតខំប្រឹងប្រែង ការសម្របសម្រួល និងការឆ្លើយតបចំពោះកង្វល់របស់អ្នកវិនិយោគជប៉ុន ដែលរដ្ឋាភិបាលកម្ពុជាបានយកចិត្តទុកដាក់យ៉ាងខ្លាំងក្នុងការរក្សា និងផ្តល់ភាពកក់ក្តៅដល់អ្នកវិនិយោគគ្រប់រូប។
លោក Mikami Masahiro ក៏បានថ្លែងអំណរគុណចំពោះរាជរដ្ឋាភិបាលកម្ពុជា ដែលបានបង្កើតបរិយាកាសវិនិយោគកាន់តែប្រសើរឡើងលើគ្រប់វិស័យ និងបានសម្តែងការប្តេជ្ញាចិត្តតំណាងឲ្យអ្នកវិនិយោគជប៉ុនក្នុងការបន្តវិនិយោគបន្ថែមទៀត ដើម្បីរួមចំណែកក្នុងការស្តារសេដ្ឋកិច្ចកម្ពុជាឡើងវិញ បន្ទាប់ពីវិបត្តិកូវីដ១៩។
|
