|
ក្នុងរយៈពេល៩ថ្ងៃដំបូងនៃការបើកសាកល្បងដោយឥតគិតថ្លៃរយៈពេលមួយខែនៃផ្លូវល្បឿនលឿនភ្នំពេញ-ព្រះសីហនុ មានយានយន្តជាង១០ម៉ឺនគ្រឿងបានធ្វើដំណើរឆ្លងកាត់ផ្លូវល្បឿនលឿន ដោយគេបានកត់សម្គាល់នូវការកើនឡើងយ៉ាងខ្លាំងនៃចំនួនអ្នកធ្វើដំណើរទៅកាន់ខេត្តឆ្នេរសមុទ្រមួយនេះ។
កាលពីដើមខែតុលា រដ្ឋបាលខេត្តព្រះសីហនុ បានឲ្យដឹងថា មានភ្ញៀវទេសចរណ៍ជាតិនិងអន្តរជាតិប្រមាណ ១១ម៉ឺននាក់ បានមកលេងខេត្តព្រះសីហនុនៅចុងសប្តាហ៍។ ការកើនឡើងនៃភ្ញៀវទេសចរណ៍នេះ ត្រូវបានគេសន្មត់ថាបានមកពីការបើកដំណើរការផ្លូវល្បឿនលឿន រួមជាមួយនឹងការធ្វើឱ្យប្រសើរឡើងនូវហេដ្ឋារចនាសម្ព័ន្ធ សន្តិសុខ បូកផ្សំនឹងទេសភាពដ៏ស្រស់ស្អាតនៃខេត្តនេះ។
អ្នកនាំពាក្យរដ្ឋបាលខេត្ត លោក ឡុង ឌីម៉ង់ បានអះអាងថា វាជារឿងមួយដែលនឹកស្មានមិនដល់ ដែលមានភ្ញៀវទេសចរណ៍ជាង១០ម៉ឺននាក់មកលេងខេត្តព្រះសីហនុក្នុងថ្ងៃឈប់សម្រាកចុងសប្តាហ៍ ដោយមិនមែនជាថ្ងៃបុណ្យជាតិ។ ជាមួយគ្នានេះផងដែរ រដ្ឋបាលខេត្តក៏បានណែនាំដល់មន្ត្រីនិងមន្ទីរពាក់ព័ន្ធទាំងអស់ត្រូវយកចិត្តទុកដាក់លើសុវត្ថិភាពប្រជាពលរដ្ឋដែលមកលេងខេត្តព្រះសីហនុឲ្យបានម៉ឺងម៉ាត់។
“និន្នាការនេះគួរឱ្យរំភើបណាស់សម្រាប់ពួកយើង។ កាលពីមុនយើងទទួលបានតែចំនួននេះក្នុងឱកាសបុណ្យភ្ជុំបិណ្ឌ ឬចូលឆ្នាំខ្មែរប៉ុណ្ណោះ។ សម្រាប់យើង ភ្ញៀវទេសចរណ៍ដែលបានមកកំសាន្តច្រើននៅចុងសប្តាហ៍ គឺមិនធ្លាប់មានពីមុនមកទេ។ ទន្ទឹមនឹងនេះផងដែរ សាធារណជនហាក់ពេញចិត្តនឹងផ្លូវល្បឿនលឿនថ្មីនេះ ជាពិសេសបច្ចុប្បន្ននេះការធ្វើចរាចរណ៍នៅមិនទាន់គិតថ្លៃនៅឡើយ»។
ក្រសួងសាធារណការនិងដឹកជញ្ជូន បានប្រកាសថាផ្លូវល្បឿនលឿននេះអាចប្រើប្រាស់បានដោយមិនគិតថ្លៃក្នុងខែតុលា។ បន្ទាប់មកនឹងត្រូវគិតប្រាក់១២ដុល្លារសម្រាប់ការធ្វើដំណើរមួយជើងក្នុងឆ្នាំដំបូងនៃប្រតិបត្តិការ។
ផ្លូវមួយខ្សែរនេះមានចម្ងាយប្រហែល២០០គីឡូម៉ែត្រ ឆ្លងកាត់ខេត្តកណ្តាល កំពង់ស្ពឺ និងកោះកុង គេត្រូវចំណាយពេលប្រហែល២ម៉ោងក្នុងការធ្វើដំណើរពីភ្នំពេញទៅខេត្តព្រះសីហនុ បើប្រៀបធៀបនឹងការធ្វើដំណើរពី៤ទៅ៦ម៉ោងកន្លងមកតាមផ្លូវជាតិលេខ៤។
តំណាងក្រសួង លោក ហ៊ាង សុធាយុទ្ធ បានប្រាប់ប្រភពថា ក្នុងមួយថ្ងៃៗមានយានយន្តរហូតដល់១៦,០០០ គ្រឿងបានប្រើប្រាស់ផ្លូវថ្មីនេះ។ លោកបានអះអាងថា ការប្រើប្រាស់ផ្លូវល្បឿនលឿននៅតែបន្តកើនឡើង ដែលមនុស្សជាច្រើនចាប់អារម្មណ៍ចង់ទទួលយកបទពិសោធន៍នៃការបើកបរលើផ្លូវថ្មីដើម្បីទស្សនាតំបន់ទេសចរណ៍ក្នុងស្រុក។
ស្របពេលជាមួយគ្នានេះដែរ ក្រុមការងារល្បាតលើផ្លូវល្បឿនលឿននេះ បានដោះស្រាយបញ្ហាតូចៗមួយចំនួនអំពីការកកស្ទះចរាចរណ៍កាលពីចុងសប្តាហ៍ និងបញ្ហាខ្លះដែលមានសត្វពាហនៈចូលទៅជិតៗផ្លូវ។ អាជ្ញាធរក៏បានណែនាំប្រជាពលរដ្ឋកុំឲ្យកាត់របងផ្លូវ ឬឲ្យសត្វគោស៊ីស្មៅតាមផ្លូវ។ យុទ្ធនាការអប់រំនេះទាមទារពេលវេលា និងការយោគយល់ពីសំណាក់ប្រជាពលរដ្ឋទាំងអស់។
|
