ស្ពានអាកាសលើរង្វង់មូលថ្មី
ក្រុមហ៊ុនវិនិយោគ OCIC បានបញ្ចេញព័ត៌មានឲ្យដឹងថា ក្រុមហ៊ុននឹងសាងសង់ផ្លូវអាកាសនិងផ្លូវក្រោមដីនៅរង្វង់មូលចោមចៅដែលគ្រោងនឹងបញ្ចប់រួចរាល់ក្នុងដំណាច់ឆ្នាំ២០២០។ ការដ្ឋានសាងសង់នេះត្រូវបានសម្ពោធកាលពីថ្ងៃទី២៩ ខែមិថុនា ដោយលោកនាយករដ្ឋមន្រ្តី ហ៊ុន សែន ដោយគម្រោងសាងសង់មានទំហំទឹកប្រាក់២២លានដុល្លារសហរដ្ឋអាមេរិក។ រង្វង់មូលចោមចៅជាចំណុចតភ្ជាប់ផ្លូវគោកដែលចេញពីរាជធានីភ្នំពេញឆ្ពោះទៅកាន់ផ្លូវជាតិលេខ៣ និងផ្លូវជាតិលេខ៤ដែលជាច្រកនាំចេញនាំចូលទំនិញរបស់កម្ពុជាទៅកាន់ទីផ្សារអន្តរជាតិបន្តតាមរយៈផ្លូវទឹក។ ការសាងសង់ថ្មីនេះក៏អាចជួយកាត់បន្ថយបញ្ហាកកស្ទះចរាចរណ៌ផងដែរ។
លោក ឌី វណ្ណដូ អ្នកតំណាងក្រុមហ៊ុន OCIC បានឲ្យដឹងថា ការសាងសង់នឹងចាប់ផ្តើមនៅថ្ងៃទី១០ ខែធ្នូ ក្រោយពីលោកបានជួបប្រជុំជាមួយអាជ្ញាធរមូលដ្ឋាន និងផ្នែកពាក់ព័ន្ធទៅនឹងបណ្តាញកប់នៅក្រោមដីមានដូចជាខ្សែកាប ខ្សែទូរស័ព្ទ អគ្គិសនី និងបណ្តាញចែកចាយទឹកស្អាត ជាដើម។ គម្រោងនេះនឹងសាងសង់ផ្លូវក្រោមដី២ជាន់ ដែលមាន២ ខ្សែដោយត្រូវជីកដីជម្រៅ ១៣ ម៉ែត្រ។
|