កសិដ្ឋាន Moo Moo ផ្តល់ជូនទឹកដោះគោស្រស់ស្តង់ដាអាមេរិក
គោ Holstein-Friesian កម្រមានឃើញណាស់នៅកម្ពុជា ប៉ុន្តែឥលូវនេះយើងអាចរកឃើញគោប្រភេទនេះជាច្រើននៅកសិដ្ឋាន Moo Moo ក្នុងឃុំអរិយក្សត្រ ដោយគ្រាន់តែធ្វើដំណើរ១៥នាទីតាមរយៈសាឡាងឆ្លងកាត់ទន្លេពីផែសាឡាងអរិយក្សត្រ។ ទឹកដោះគោស្រស់ផលិតចេញពីគោចំនួន៣០០ក្បាលបានឆ្លងកាត់ម៉ាស៊ីនបញ្ចុះសីតុណ្ហភាព បញ្ចុះទៅកាន់៤ដឺក្រេ។ បន្ទាប់មកត្រូវឆ្លងកាត់ម៉ាស៊ីនកម្តៅ និងសម្លាប់មេរោគ មុននឹងត្រូវវេចខ្ចប់ក្នុងដបដែលមានម៉ាក Moo Moo។ មានទីតាំងនៅស្រុកល្វាឯម ភូមិអរិយក្សត្រ ខេត្តកណ្តាល កសិដ្ឋាននេះពេលខ្លះក៏បើកទទួលស្វាគមន៍ទស្សនកិច្ចសិក្សាដែលរៀបចំឡើងដោយសាលារៀនឯកជនដែលនាំសិស្សជាក្រុមដើម្បីសិក្សាស្វែងយល់ពីដំណើរការនៃការផលិតទឹកដោះគោផងដែរ។
បើយោងតាមម្ចាស់កសិដ្ឋានជនជាតិអាមេរិក អាយុ២៩ឆ្នាំ លោក Kenny Matthews ដែលអាចនិយាយភាសាខ្មែរបានយ៉ាងស្ទាត់ជំនាញនោះបានឲ្យដឹងថា ទឹកដោះគោម៉ាក Moo Moo ផ្តល់ជូនស្តង់ដាខ្ពស់ទៅលើរសជាតិ គុណភាព និងអនាម័យ ដែលយោងទៅតាមស្តង់ដាអាមេរិក។ លោកបានបន្តចែករំលែកថា គោលបំណងរបស់លោកគឺចង់ជួយដល់ប្រជាជនកម្ពុជាឲ្យបានទទួលផលិតផលទឹកដោះគោស្រស់ដែលជាផលិតផលក្នុងស្រុក និងទទួលបានគុណភាពដូចគ្នាទៅនឹងប្រទេសកំណើតរបស់លោក ព្រោះលោកស្រលាញ់ប្រទេសកម្ពុជា និងចង់ជួយដល់ខ្មែរក្នុងរយៈពេលយូរអង្វែង។
កសិដ្ឋាន Moo Moo បានពង្រីកការផលិតពីគោ១៥០ក្បាលទៅ៣០០ក្បាល ដែលគោទាំងនេះត្រូវបាននាំចូលពីប្រទេស នូវែលសេឡង់។ Matthews បានបង្ហើបឲ្យដឹងថា ក្នុងខែកុម្ភៈឆ្នាំក្រោយនេះ កសិដ្ឋាននឹងបន្ថែមគោចំនួន១០០០ក្បាលទៀត។ បច្ចុប្បន្ននេះទឹកដោះគោនេះមានផ្គត់ផ្គង់នៅហាងចំនួន៧០ក្នុងរាជធានីភ្នំពេញ និងអាចកុម្ម៉ង់ទិញបានតាមរយៈទូរស័ព្ទ Facebook និងដឹកជញ្ជូនដល់គេហដ្ឋាន។ នាដើមឆ្នាំក្រោយនេះ ផលិតផលនេះនឹងមានលក់ក្នុងខេត្តសៀមរាប និងចាប់ផ្តើមបន្តទៅកាន់ខេត្តនានានៅក្នុងប្រទេស។
|